बाढी पहिरोका कारण देशभर १७ जनाको मृत्यु, अझै तीन दिन भारी वर्षा हुने

काठमाडौं २७ असार । बिहीबार रातिदेखि अविरल परेको वर्षाका कारण देशभर १७ जनाको मृत्यु भएको छ ।

अविरल वर्षाका कारण काभ्रैपलाञ्चोक जिल्ला बनेपा ३ की ५५ बर्षीया गोमा दंगाल र ७ बर्षीया सोहनी दंगालको मृत्यु भएको छ । अर्की नातीनी अनुस्का र बहुहारी सुशिलाको उद्दार गरि स्थानीय अस्पतालमा उपचार भइरहेको छ । 
भोजपुर जिल्लाको रामप्रसाद राई गाउँपालिका–७ मा ६६ वर्षीय जगतबहादुर राईको मृत्यु भएको छ । वर्षाका कारण घर भत्किदा पर्खालले लागेर मृत्य भएको हो । 
त्यस्तै टेम्केमैयुङ गाउँपालिका–९ का १४ वर्षीय जनक विकको पनि पहिरोका कारण मृत्यु भएको छ ।
रामेछाप जिल्ला रामपुरकी ४५ वर्षीया पदमकुमारी सुनुवारको मृत्यु भएको छ ।

पर्साको पर्सागढी नगरपालिका १ का १० बर्षीय निखिल पटेलको मृत्यु भएको छ । स्थनीय सिंग्याही खोलाले बगाएर उनको मृत्यु भएको हो ।

त्यस्तै ललितपुरमा समेत एक जनाको मृत्यु भएको छ । महानगरीय प्रहरी परिसर ललितपुरका अनुसार बागमती नगरपालिका- ३ का ११ वर्षीय सरोज तामाङ पहिरोमा पुरिएर मृत्यु भएको हो।

मकवानपुर जिल्लाको थाहा नगरपालिका – ३ की बालिका सञ्चना बलामी मृत्यु भएको छ । स्थानीय महाभीर खोलाले बगाउँदा घाइते भएकी उनको मृत्यु भएको हो । खोलाबाट उद्धार गरि उपचारको क्रममा उनको मृत्यु भएको प्रहरीले जनाएको छ । 

काठमाडौँको मूलपानी बाबाचोकस्थित स्वास्थ्यचौकी भवन नजिकै पर्खाल भत्किँदा एकै परिवारका दुई जना र अर्को एक जनाको मृत्यु भएको छ । बारा देवताल गाउँपालिका–५ स्थायी घरभई कागेश्वरी मनोहरा नगरपालिका–६ बस्ने ३५ वर्षीया शर्मीला यादवलाई उद्धार गरी अस्पताल पु¥याएपछि नेपाल मेडिकल कलेज अत्तरखेलले मृत घोषणा गरेको छ । उहाँका १० वर्षीय छोरा र सोही ठेगाना भएकी ३० वर्षीय नितु यादवको उद्धार गर्दै गर्दा मृत्यु भइसकेको महानगरीय प्रहरी वृत बौद्धका प्रहरी नायब उपरीक्षक नरेन्द्र चन्दले जानकारी दिनुभयो । उहाँका अनुसार बलराम खत्रीको पक्की घरको पर्खाल भत्किएर टहरामा बस्दै आएका यादव परिवारलाई पुरेको हो ।

सिन्धुलीको फिक्कल गाउँपालिका–१ झुल्केमा पहिराले गोठसहित बगाउँदा महिलाको पुरिएर मृत्यु भएको हो । गोठमा गाईलाई खोले दिन गएकाबेला ३५ वर्षीया हेमकुमारी सुनुवारको पहिराले बगाउँदा मृत्यु भएको गाउँपालिकाका उपाध्यक्ष पार्वती सुनुवारले जानकारी दिनुभयो ।

धादिङमा पहिरोले घर लडाउँदा बालिकाको मृत्यु भएको छ। गजुरी गाउँपालिका(४ की ८ वर्षीया अस्मिता तामाङको मृत्यु भएको प्रहरी उपरीक्षक राजकुमार वैदवारले बताए।

खोटाङ जिल्लाको खोटेहाङ गाउँपालिका–२ वाप्लुखामा पहिराले घर बगाउँदा बेपत्ता रहेका तीन जनाको शव फेला परेको छ । घरमाथिबाट आएको पहिराले घर बगाउँदा आज बिहान बेपत्ता रहेका २९ वर्षीया रेखा राई र उहाँका छोरा चार वर्षीय रमन र सात महीनाका रोजनको शव फेला परेको हो । पहिराले मृतकका श्रीमान् ३१ वर्षीय विष्णु राई गम्भीर घाइते हुनुभएको छ ।

त्यस्तै ओखलढुंगामा समेत वर्षाका कारण एक जनाको ज्यान गएको छ ।

अझै तीन दिनभारी वर्षा हुने
न्यूनचापीय रेखा ९वर्षा गराउने वायु० नेपाल प्रवेश गरेकाले देशभर वर्षा भइरहेको छ । न्यूनचापीय रेखा र न्यूनचापीय क्षेत्रसँगै रहेकाले देशभर वर्षा भइरहेको जल तथा मौसम अनुमान महाशाखाका मौसमविद् शान्ति कँडेलले बताए।

“आगामी तीन दिन देशभर मनसुन अति सक्रिय हुनेछ, जसले गर्दा बाढी, पहिरोको उच्च जोखिम रहेकाले सतर्कता उपनाउनुपर्ने हुन्छ”, उनले भने ।  विशेषगरी आज र शनिबारलाई देशभर नै जोखिम रहेकाले नदी तथा तटिय क्षेत्रमा हुनेहरु सुरक्षित स्थानमा सर्न मौसमविद्को आग्रह छ । खासगरी २५ जिल्लामा कहिले मध्यम केहिले भारी वर्षा भइरहेने बताइएको छ । 

बाढी पूर्वानुमान महाशाखाका अनुसार वाग्मती नदीको तराई क्षेत्रमा बहाब खतराभन्दा माथि बढ्दो क्रममा रहेको छ । खास गरी प्रदेश नं १, २ र ३ का सबै चुरे खोलामा बहाब सतर्कता माथि र उच्च खतरा शनिबारसम्म कायम रहने भएकाले सर्तक रहन आग्रह गरिएको छ ।

	महाशाखाको पछिल्लो विवरणअनुसार आज काठमाडौँ उपत्यकामा १९.० मिलिमिटर वर्षा भएको छ । त्यस्तै पोखरामा २३.०, दाङमा २३.४, जुम्लामा १५.९, धनगढीमा २५.५, नेपालगञ्जमा २५.६, सिमरामा २४.४, दिपालमा २४.६ र वीरेन्द्रनगरमा २४.३ मिलिमिटर वर्षा मापन गरिएको छ ।