प्रदेश न.५ मा संसदीय पत्रकारिता तालिम सुरु

संसदीय पत्रकारितासम्बन्धी क्षमता अभिवृद्धि तालिम रुपन्देहीमा आजदेखि सुरु भएको छ । मिडिया एक्शन नेपालको आयोजना र ‘अष्ट्रेलियन एड’को सहयोगमा आयोजना गरिएको तालिममा रुपन्देही, कपिलवस्तु, नवलपरासी र पाल्पा जिल्लाका ३० पत्रकारको सहभागिता रहेको छ ।

दुई दिनसम्म चल्ने तालिममा संसदीय पत्रकारिताको सिद्धान्त र अभ्यासबारे प्रशिक्षण दिँदै प्रा रामकृष्ण रेग्मीले संसद्मा छलफल हुने सबै विषयवस्तु मिडियाको मुख्य सरोकारको विषय हुने गरेकाले संसदीय विषयमा पत्रकार जानकार हुनुपर्ने बताए । “तीन तहका सरकारका  गतिविधि, प्रक्रिया र कारवाहीबारे सूचना सङ्कलन गरी प्रसारण गर्ने भएकाले पत्रकारले आफूलाई तयारी अवस्थामा राख्नुपर्छ”, उहाँले भने । 

तालिममा मिडिया र संसद्बीचको अन्तरसम्बन्ध, संसदीय पत्रकारिताका विषय, सुशासनलगायतका विषयमा छलफल हुने मिडिया एक्शन नेपालका अध्यक्ष लक्ष्मणदत्त पन्तले जानकारी दिए ।