ग्रामीण प्रविधिको उपयोगले जीवनस्तरमा सुधार

बेथानचोक गाउँपालिकाको ढुङखर्कमा आज भएको स्थलगत निरीक्षणपछि ग्रामीण प्रविधि केन्द्रले धुलिखेलमा आयोजना गरेको वातावरणमैत्री गाउँ विकाससम्बन्धी कार्यक्रममा सरोकारवालाले वैकल्पिक प्रविधिको रुपमा ग्रामीण प्रविधिको उपयोगले विपन्न समुदायका कृषक लाभान्वित भएको बताए ।

ढुङखर्कका जीतबहादुर श्रेष्ठले गाँउमा विगतमा पुरानो प्रविधिले पिसानीको काम भएकामा अहिले पानीघट्ट सुधार कार्यक्रम लागू भएपिछ आधुनिक प्रविधिबाट मकै, कोदो फापरलगायत अन्नबाली पिसाउने काम भएको बताउनुभयो ।

राष्ट्रिय योजना आयोगका सदस्य डा प्रभु बुढाथोकीले गरिबी निवारणका लागि जीविकोपार्जनका कार्यक्रमले समुदायलाई फाइदा पुग्ने बताउनुभयो ।

वैकल्पिक ऊर्जा प्रर्वद्धन केन्द्रका कार्यकारी निर्देशक रामप्रसाद धितालले वातावरणमैत्री नवीकरणीय ऊर्जालाई स्थानीय तहले संस्थागत गर्नुपर्ने आवश्यकता औँल्याउँदै यसलाई गाउँपालिकाको क्षेत्रमा प्रभावकारी बनाउनुपर्नेमा जोड दिनुुभयो ।

ग्रामीण प्रविधि केन्द्रका कार्यकारी निर्देशक गणेशलाल श्रेष्ठले कार्यक्रम सञ्चालन भएको क्षेत्रमा सुधारिएको चुल्हो वितरण भएको र कार्वन न्यूनीकरणको प्रयास भएको बताउनुभयो ।

बेथानचोक गाउँपालिकाका उपाध्यक्ष सरिता लामिछानेले चलालगणेशस्थानका कतिपय भेगमा सुधारिएको चुल्हो प्रयोग गर्नेको सङ्ख्यामा कमी आएको बताउनुभयो ।

श्रीलङ्का, बङ्गलादेश, भारत र नेपालमा भएका कार्वन न्यूनीकरण एवम् विपन्न केन्द्रित दिगो वातावरणमैत्री गाउँ विकास कार्यक्रममध्ये नेपालमा सबैभन्दा प्रभावकारी भएको बताइएको छ । वातावरणमैत्री विकल्पअन्तर्गत ढुङखर्क बाहेक चलालगशेस्थान, च्याम्रेङबँेसीका गाउँमा नवीकरणीय ऊर्जा, जलवायु प्रतिरोधी कृषि प्रणाली, वन तथा वातावरण संरक्षण एवम् फोहोर व्यवस्थापनलगायत स्थानीय समुदायको जीविकोपर्जानसँग सम्बन्धित कार्यक्रम सञ्चालनमा छन् । तीन वर्षसम्म सञ्चालन भएको विभिन्न कार्यक्रममा रु ६३ लाख खर्च भएको छ ।