महिला राजनीतिज्ञसँगको अन्तरक्रिया

उपसभामुख डा शिवमाया तुम्बाहाङ्फेले समाजमा महिलाको भूमिका परिवर्तन हुँदै गएको अवस्थामा महिलाप्रति हेर्ने दृष्टिकोण अझै पनि परिवर्तन नभएको बताएकी छन् ।
संयुक्त राष्ट्रसङ्घीय विकास कार्यक्रम (युएनडिपी), सञ्चारीका समूह र संयुक्त राष्ट्रसङ्घीय शैक्षिक, वैज्ञानिक तथा सांस्कृतिक सङ्गठन (युनेस्को)ले संयुक्त रुपमा यही कात्तिक १ र २ गते गोदावरीमा आयोजना गरेको दुईदिने ‘पत्रकार महिलाका लागि निर्वाचन र आम सञ्चारमाध्यम विषयक कार्यशाला र महिला राजनीतिज्ञसँगको अन्तरक्रिया’ समापन कार्यक्रममा उपसभामुख तुम्बाहाङ्फेले समाजमा महिलाको काम र भूमिका परिवर्तन हुँदै जाँदा उसलाई हेर्ने दृष्ट्रिकोण अझै उस्तै रहेकोमा चिन्ता व्यक्त गरेकी छन् ।

उनले भनिन्, “जुनसुकै क्षेत्रमा लागी परेका महिलाले निरन्तर दरिलो तवरको भूमिका निर्वाह गर्दै जाँदा एक दिन अवश्य सफलता प्राप्त गर्न सक्छाँै ।” महिलाले समाजमा निर्वाह गरेको जिम्मेवारी, पेशालगायत व्यवसायले स्वयं पुरातन सोचको अन्त्य गराउन सक्ने तुम्बाहाङ्फेको बुझाइ रहेको छ ।

हरेक महिलाले विगतका कुराबाट सिक्दै अघि बढ्नु जरुरी भएको तुम्बाहाङ्फले औँल्याउनुभयो । हाल पुरुषहरु रहेको नेतृत्व तहमा यदि महिलाले भूमिका निर्वाह गर्ने अवसर पाउने हो भने उनीहरु पक्कै सफल हुने उनले बताइन् ।

सांसद रामकुमारी झाक्रीले समाजशास्त्र विषयमा समेत महिलालाई पछि पारिएको गुनासो गरेकी छन् । उनले भनिन्, “पुस्तकमा समेत हेपिएका महिलाको विरोध नीति निर्माणको क्रममा केही तलमाथि हुनु कुनै नयाँ कुरा होइन ।”

सांसद विन्दा पाण्डेले विगतमा अन्तरपार्टी महिला सञ्जालले महिलाको राजनीतिक भूमिकाको व्याख्या गर्दै अभिपे्ररणा भरेको भनी धन्यवाद व्यक्त गरेकी छन् । राष्ट्रियसभा सदस्य विमला राई पौडेलले मानिसको चरित्रहत्या गर्ने कुरामा धेरैभन्दा धेरै बुझेर बाहिर ल्याउन आग्रह गरिन् ।

प्रदेशसभा सदस्य अष्टलक्ष्मी शाक्यले महिलाको राजनीतिक विषयलाई साझा रुपमा विकास गरी माथि पु¥याउन जोड दिनुपर्ने बताएकी छन् । उनले भनिन्, “देशमा राजनीतिक व्यवस्था परिवर्तन भएता पनि पितृसतात्मक मानसिकता भने अझै परिवर्तन भएको छैन ।”

सञ्चारिका समूहकी अध्यक्ष नितु पण्डितले यो कार्यक्रमले सञ्चार क्षेत्रमा लागेका महिला र राजनीतिक तहमा लागिपरेका महिलाबीच पुलको काम गर्न अहम् भूमिका निर्वाह गरेको बताएकी छन् ।