ज्यान गुमाएका परिवारलाई क्षतिपूर्तिको माग

प्रतिनिधिसभाको आजको शून्य समयमा सांसदले सर्लाहीबाट काठमाडौँ आइरहेको यात्रुवाहक बस गत शुक्रबार त्रिशूली नदीमा खस्दा ज्यान गुमाउन पुगेका परिवारलाई क्षतिपूर्ति र घाइतेलाई उपचारको व्यवस्था मिलाउन माग गरेका छन् । सांसदद्वय अमरेशकुमार सिंह र इन्द्रकुमारी विश्वकर्माले सडकको सुरक्षा गर्न नसकेकाले सडक दुर्घटना बढ्दै गएको बताउनुभयो । बैठकमा सांसदहरु अमृताकुमारी अग्रहरी, कृष्णभक्त पोखरेल, गणेशकुमार पहाडी र गौरीशङ्कर चौधरीले असार २६ गते र त्यसपछिको लगातारको वर्षाले बाढी तथा पहिरोबाट पीडित परिवारलाई राहत तथा पुनःस्थापना गर्न सरकारको ध्यानाकर्षण गराउनुभयो । सांसद आशाकुमारी विकले ट्याक्सी चालकले लापरवाही ढङ्गले यात्रुसँग भाडा असूल गर्ने गरेको, घनश्याम खतिवडाले बाढीपीडितलाई औषधोचारको व्यवस्था गर्न सरकार चुकेको र खगराज अधिकारीले कालीगण्डकी डाइभर्सनपछि तराई तथा पहाडका केही जिल्लामा सिँचाइ सुविधाबाट अवरोध पुग्ने बताउनुभयो । सांसद झपटबहादुर रावलले सुदूरपश्चिमाञ्चल क्षेत्रमा औद्योगिक क्षेत्रको पुनःस्थापना गर्न माग गर्नुभयो । सांसद गगनकुमार थापाले प्रतिनिधिसभाको बैठकमा सांसदहरुले उठाउने गरेको जवाफ दिन सम्बन्धित मन्त्रालयका मन्त्रीले बेवास्ता गर्ने गरेको बताउनुभयो ।