एथेन्स, ११ माघ । ग्रीसका सांसदहरुले शुक्रबार मेसेडोनियाको नाम परिवर्तनको विषयमा ऐतिहासिक मतदान गर्दैछन् । सडक र सदन दुबैमा चर्को विरोधका बीच छिमेकी मेसेडोनियाले गरेको आफ्नो मुलुकको नाम परिवर्तनलाई ग्रीसको संसदले अनुमोदन गर्न लागेको हो ।
ग्रीसको संसदले मतदान गरी पारित भएमा ग्रीस र मेसेडोनियाबीच लामो समयदेखि जारी कूटनीतिक विवाद तत्कालका लागि समाधान हुनेछ । दुई मुलुकबीच मेसेडोनियाले सन् १९९१ मा स्वतन्त्रता प्राप्त गरेदेखि नै नामको विषयमा विवाद रहँदै आएको छ ।
खासगरी, ग्रीसको एक राज्य मेसेडोनिया र युगोस्लाभियाबाट सन् १९९१ मा स्वतन्त्र भएको मेसेडोनियाबीच नाम जुधेका कारण विवाद रहँदै आएको छ ।
“यो सम्झौतासँगै ग्रीसले आफ्नो इतिहास, यसको चिन्ह, यसको परम्परा पुनः प्राप्त हुनेछ,” संसदमा दुई दिनदेखि जारी छलफलका क्रममा प्रधानमन्त्री अलेक्सिस सिप्रासले बताउनुभयो । उहाँले मतदानसँगै तीस वर्षदेखिको विवाद सुल्झिने विश्वास व्यक्त गर्नुभयो ।
उहाँले मेसेडोनिया राज्य अब एउटा असल मित्रराष्ट्र, सहकार्य, शान्ति र सुरक्षाका लागि एउटा समर्थक राष्ट्र हुने बताउनुभयो ।
मेसेडोनियाको संसदले जनवरी ११ मा मुलुकको नाम परिवर्तन गरी “गणतन्त्र उत्तर मेसेडोनिया” राख्ने प्रस्ताव पारित गरेको थियो । तर, सम्झौता बमोजिम नयाँ परिवर्तित नामलाई ग्रीसको संसदले पनि पारित गर्नुपर्नेछ ।
सन् १९९१ देखि ग्रीसले छिमेकी मुलुक मेसेडोनियाको नामलाई अस्वीकार गरिआएको छ किनभने ग्रीसको उत्तरी प्रान्तको नाम पनि मेसेडोनिया रहेको छ । विगतमा दुबै मेसेडोनिया एकै थिए ।
ग्रीसको संसदले मेसेडोनियाको नाम परिवर्तनलाई अनुमोदन गरेपछि गणतन्त्र उत्तर मेसेडोनियालाई नेटोको सदस्यता प्राप्त गर्न बाटो खुल्नेछ । सम्भवतः अर्को महिना मेसेडोनियाले नेटो सदस्यताका लागि आवेदन दिनेछ जसलाई ग्रीसले पनि समर्थन गर्नेछ ।
नाम परिवर्तनको विपक्षमा ग्रीस र मेसेडोनिया दुबै स्थानमा प्रदर्शन भइरहेका छन् । कतिपय ठाउँमा हिसात्मक झडप समेत भएका छन् ।
प्रतिक्रिया