लहान, ४ भदौ । पोखरीमा डुबेर सिरहाको लहान नगरपलिका– १३ दम्दाह टोलमा एक बालकको मृत्यु भएको छ ।
घरबाट शनिबार दिउँसो खेल्न निस्किएका स्थानीय जगवीर यादवको आठ वर्षीय छोरा राजु यादवको पोखरीमा डुबेर मृत्यु भएको हो ।
राजु साँझसम्म घर नफर्किएपछि खोजी गर्ने क्रममा घरबाट १० मिटर टाढाको पोखरीमा डुबेर मृत अवस्थामा भेटिएको प्रहरीले जनाएको छ ।
यसैगरी अविरल वर्षासँगै आएको बाढीका कारण विस्थापित भएका सप्तरीको तिलाठी कोइलाडी गाउँपालिकाका बाढीपीडित परिवारलाई शनिबार साँझ सामूहिक भोजन गराइएको छ ।
कारितास नेपालको सहयोगमा श्रीपुर्राज सामुदायिक विकास केन्द्र सप्तरीले बाढीबाट विस्थापित भएका तिलाठी कोइलाडी गाउँपालिकाका एक हजार ४०५ जना बाढीपीडितलाई भोजन गराएको हो ।
गाउँमै मेस सञ्चालन गरी बाढीपीडितलाई खाना खुवाइएको श्रीपुर्राज सामुदायिक विकास केन्द्रका कार्यक्रम संयोजक विनोदानन्द चौधरीले जानकारी दिनुभयो ।
यसअघि पनि कारितास नेपालको सहयोगमा श्रीपुर्राज सामुदायिक विकास केन्द्रले सप्तरीको हनुमाननगर कंकालनीमाई नगरपालिका– ११ इनरुवाका ५०० बाढीपीडित परिवारलाई चिउरा, भुजिया र मिनरल वाटर लगायतका राहत वितरण गरेको थियो ।
प्रतिक्रिया