पाकिस्तानमा मनाइँदै खल्लो इद

सोमबार सुरु भएको इदको पूर्व सन्ध्यामा आइतबार बिहान तेल ट्याङ्कर दुर्घटनामा परी मृत्यु हुनेको सङ्ख्या १५३ पुगेको समाचार अधिकारीहरुले दिएका छन् ।

अधिकांश पाकिस्तानीहरुले सोमबार बिहान सुरु भएको यस पर्वलाई उक्त समाचारसँगै यसवर्षको यहाँको इद पर्व नै निकै खल्लो महसुश भएको बताएका छन् ।

आइबारको सो आगलागीमा परी अन्य सयौं व्यक्ति घाइते भएका छन् । प्रमुख सहरको बाहिरी इलाकामा रहेको बहालपुरमा अवस्थित एक अस्पताल परिसरमा उक्त आगलागीमा परी मृत्यु भएका आफ्ना आफन्तजनको शव बुझ्नेको भिड लागेको छ ।

पाकिस्तानबाट प्राप्त समाचारमा भनिएको छ– एकातर्फ उक्त अस्पतालमा शब बुझ्नेहरुको भिड लागेका दृश्यहरु टेलिभिजनमा देखाइएका छन् भने अर्कातर्फ इदको शुभकामन साटासाट गर्नेहरुको चहलपह पनि त्यत्तिकै छ ।

जलेर मृत्यु भएका आफन्तको शब बुझ्नेको भिडका दृश्यले सबैलाई खिन्न बनाएको छ– अधिकारीहरुले जनाएका छन् ।

लन्डनको भ्रमणमा रहनुभएका पाकिस्तानका प्रधानमन्त्री नवाज सरिफले आफ्नो भ्रमण छोट्याई सोमबार बिहान स्वदेश फर्किनुभएको छ । उहाँ सोमबारै बिहान घटानास्थलमा पुगेर सो घटनामा परेका आफन्तलाई समवेदना प्रकट गर्नुभएको बताइएको छ ।

बहालपुर जिल्लामा भएको घटनामा परी ज्यान गुमाउने व्यक्तिको सङ्ख्या १५३ पुगेको र घाइतेमध्ये अझै केहीको अवस्था गम्भीर रहेकाले मृतकको सङ्ख्या केही बढ्न सक्ने अनुमान गरिएको छ ।

बहालपुर जिल्लाको अहमदपुर साकी राजमार्गमा सो दुर्घटना भएको हो । उक्त मार्गमा गुडिरहेको पेट्रोलियम पदार्थ बोकेको एक ट्याङ्कर अकस्मात सडकमा पल्टिएको थियो ।

सडकमा ट्याङ्कर पल्टिएपछि त्यसमा रहेको करिब ४० हजार लिटर तेल पोखिएको र पोखिएको सो तेल बटुल्नका लागि जम्मा भएका नागरिकलाई आगालागीका शिकार भएका थिए ।