दुवै मिर्गौला फेल भएका पूर्वजनमुक्ति सेना थामीद्धारा सहयोगका लागि आग्रह

काठमाडौं, ८ भदौ । दुवै मिर्गौला काम नलाग्ने भएर केही महिनायतादेखि काठमाडौंस्थित ग्रिनसिटी अस्पतालमा उपचारत पूर्व जनमुक्ति सेना बुद्ध थामीको परिवारले उनको उपचारमा सहयोगको लागि आग्रह गरेको छ ।
सिन्धुली जिल्ला कमलामाई नगरपालिका वडा नं. ५ का ३६ वर्षीय थामीको सहयोग जुटाउन शनिबार पूर्वजनमुक्ति सेना बुद्ध थामी बचाउ अभियानले रिपोर्टर्स क्लबमा आयोजना गरेको पत्रकार सम्मेलनमा पीडित परिवारले उपचारमा सहयोगको लागि यस्तो आग्रह गरेको हो । ०५५ सालदेखि जनयुद्धमा होमिएका थामी परिवर्तनको योद्धा रहेको परिवारको भनाई छ । परिवारका अनुसार बुद्ध थामीलाई आज बज्रपात परेको छ । यसका लागि सबै न्यायप्रेमी र सहयोगी मनहरु एकजुट हुन आवश्यक रहेको परिवारले बताएको छ ।
कार्यक्रममा पीडित थामीले आफूलाई बचाउनको लागि सरकारले सहयोग गर्नुपर्ने बताए । उनले भने,‘म बाँच्न चाहन्छु, बाँचेर अझै पनि देशको सेवा गर्न चाहन्छु ।’ थामी बिरामी भएपछि कतिखेर मर्ला भन्ने भएर घरबेटीहरुले पनि कोठा दिन नमानिरहेको परिवारको गुनासो छ ।
थामीलाई सहयोग गर्न चाहनुहुनेहरुले उनको ९८४४४६५३२२ को मोबाइल नं.मा सम्पर्क गर्न र एनआइसी एसिया बैंकको खाता नम्बर NIC ASIA BANK 6557040986652401 मा सक्दो आर्थिक सहयोग गर्न परिवारले अपिल गरेको छ ।