एक साताभित्र स्थानीय तहमा कर्मचारी व्यवस्थापन : मन्त्री बस्नेत

रिपोर्टर्स क्लब दाङले आज यहाँ आयोजना गरेको साक्षात्कार कार्यक्रममा मन्त्री बस्नेतले २० वर्षपछि स्थानीय तहको चुनाव भई जनप्रतिनिधि निर्वाचित भए पनि कर्मचारी व्यवस्थापन हुन नसक्दा जनताले सेवा पाउन नसकेका बताउनुभयो ।

उहाँले भन्नुभयो, “सिंहदरबारको सेवा गाउँमै भनेका थियौँ, केही समयमा त्यो सेवा जनतालाई दिन सरकार लागेको छ ।” मन्त्री बस्नेतले पहिलो चरणमा हाल भएका कर्मचारीलाई व्यवस्थापन गरी सबै स्थानमा पठाउने र बाँकी कर्मचारीको व्यवस्था गरी पुनः व्यवस्थापनमा लाग्ने बताउनुभयो ।

उहाँले एकात्मक राज्य प्रणालीमा चलेको कर्मचारी संयन्त्र अहिले संघीय संरचनामा जाँदा व्यवस्थापनमा केही समस्या भएको बताउनुभयो । तोकेको र खटाएको स्थानमा कर्मचारी नगए कडा कदम चाल्ने उहाँको भनाइ थियो । “जनताको सेवक भएपछि तोकेको स्थानमा जानुपर्छ, होइन भने बिदाइ भएर जानुको विकल्प छैन”, उहाँले भन्नुभयो ।

मन्त्री बस्नेतले प्रधानमन्त्रीको भारत भ्रमणले दुई देश बीचको सम्बन्ध थप प्रगाढ बनाउन भूमिका खेलेको बताउनुभयो ।