स्वास्थ्य बिमा गरेका ५८ बिरामीले वीरमा उपचार गराए

सबैभन्दा पहिले स्वास्थ्य बिमा सुरु भएको कैलाली जिल्लाबाट उपचार गराउन आउने बिरामको सङ्ख्या उल्लेख्य भए पनि इलाम, पाल्पा, कास्की, बागलुङलगायतका जिल्लाबाट आएका बिरामीले पनि सेवा लिएका छन् ।

सामाजिक स्वास्थ्य सुरक्षा विकास समितिले पहिलोपल्ट वीर अस्पतालसँग गत वर्ष असार १२ गते बिमा गराएका बिरामीका लागि उपचार गर्न सम्झौता गरेको थियो ।

एक वर्षको अवधिमा उपचार गराएका बिरामीको वीरले रु तीन लाख ४२ हजार १७९ समितिसँग शोधभर्ना माग गरेको छ । माग गरिएको रकममध्ये रु दुई लाख ७२ हजार ७६ अस्पतालले पाइसकेको छ ।

वीर अस्पतालका अधिकृत टीकाराम पनेरुका अनुसार सम्झौतापछि कैलालीका भीमबहादुर खड्काको पहिले उपचार गरिएको थियो ।

हर्निया, मिर्गौला, मधुमेह, थाइराइडलगायत रक्तचापको उपचारका लागि धेरै बिरामी आउने गरेको वीर अस्पतालले जनाएको छ ।

स्वास्थ्य बिमाका सदस्य बनेका बिरामीले आफ्नो पायक पर्ने नजिकका अस्पतालमा उपचार सम्भव नभए वा चिकित्सकको सल्लाहका आधारमा ठूला अस्पतालमा उपचार गर्न पाइने व्यवस्था छ तर चिकित्सकको सल्लाहबिना उक्त बिरामीको उपचार स्थानीय वा नजिकको स्वास्थ्य केन्द्रमा सम्भव हुँदाहुँदै केन्द्रका ठूला अस्पतालमा उपचार गराउन चाहेमा भने बिमा कार्यक्रमबाट ५० प्रतिशतमात्र सेवा लिन सकिनेछ ।

वीर अस्पतालबाहेक शिक्षण अस्पताल महाराजगञ्ज, गङ्गालाल, मानसिक रोग अस्पताल, मानवअङ्ग प्रत्यारोपण केन्द्र भक्तपुर, निजामती अस्पताल, शुक्रराज ट्रपिकल तथा सरुवा रोग अस्पताल, प्रसूति गृहलगायतमा पनि उपचार गराउन सकिनेछ ।

सरकारले स्वास्थ्यलाई सबै जनताको पहुँचमा पु¥याउन २०७२ चैत महिनादेखि कैलालीबाट स्वास्थ्य बिमा कार्यक्रम सुरु गरेको थियो । हाल यो कार्यक्रम १२ जिल्लामा लागू भइसकेको छ ।

स्वास्थ्य बिमामा सहभागीले बिमा फाराम भर्दा नै कहाँ उपचार गराउने हो, त्यो स्वास्थ्य संस्थाको नाम उल्लेख गर्नुपर्छ । त्यसैअनुसार स्वास्थ्य चौकी, प्राथमिक स्वास्थ्य केन्द्र, जिल्ला अस्पताल, अञ्चल अस्पताल, क्षेत्रीय अस्पताल हुँदै केन्द्रीय अस्पतालसम्म उपचार गराउन पाउने व्यवस्था गरिएको छ ।

समितिका कार्यकारी निर्देशक डा गुणराज लोहनीले पहिलो बिन्दू प्राथमिक स्वास्थ्य केन्द्र तोकेको र त्यहाँबाट नहुने भएमा मात्रै त्यसमाथिका अस्पतालमा गई सेवा लिन पाउने बताउनुभयो । ‘‘एकैपटक माथिल्लोस्तरको अस्पतालमा गयो भने त्यसमा पाउने सहुलियतमा कटौती हुनेछ’’ – उहाँले भन्नुभयो ।

स्वास्थ्य बिमामा सहभागी हुने व्यक्तिले वार्षिक रु ५० हजारसम्मको उपचार गर्न पाउने व्यवस्था सरकारले गरेको छ । पाँचजना सदस्य भएका परिवारले बिमाका लागि फाराम भर्दा वार्षिक रु दुई हजार ५०० प्रिमियम तिर्नुपर्छ । पाँचभन्दा बढी परिवारका सदस्य छन् भने प्रतिसदस्य रु ४५० थप तिर्नुपर्छ र उसको परिवारले थप १० हजार बढी रकम बराबरको उपचार सहुलियत पाउँछ । यो रकम प्रायः सबैखाले रोगको उपचारमा प्रयोग हुन्छ । तर सरकारले पहिले नै निःशुल्क गरेको रोगको उपचार भने यथावत् रहने बताइएको छ ।