धनकुटामा टेलर र टेम्पु जुध्दा २ जनाको मृत्यु, २ घाइते

धनकुटा । धनकुटाको छथर जोरपाटी गाउँपालिका–२ फलैचामा टेलर र टेम्पु ठक्कर खाँदा दुई जनाको घटनास्थलमै मृत्यु भएको छ । दुर्घटनामा परी दुई जना घाईते भएका छन् ।

हिलेबाट जोरपाटीतर्फ जादै गरेको को।२ ह।६६११ नम्बरको टेम्पु र विपरीत दिशाबाट आईरहेको को।१ ख।६९१२ नम्बरको टेलर दिउँसो करिव १२ बजे ठक्कर खाएको प्रहरीले जनाएको छ । दुर्घटनामा परी टेम्पु चालक धनकुटा–२ का २५ बर्षीय दशरथ पाख्रीन र टेम्पुमा सवार तेह्रथुम छथर गाउँपालिका–१ का ४२ बर्षीय साङ्गे शेर्पाको घट्नास्थलमै मृत्यु भएको हो ।

टेम्पुमा सवार छथर जोरपाटी गाउँपालिका–५ का २२ बर्षीय रविन घिमिरे र तेह्रथुमको लालिगुँरास नगरपालिका–५ का २५ बर्षीय प्रदिप बस्नेत घाइते भएका छन् । उनीहरुलाई उपचारका लागि धनकुटा जिल्ला अस्पताल लगिएको धनकुटाका ट्राफिक प्रहरी दिपक खड्काले जानकारी दिए ।