अस्ट्रेलिया प्रहरीको फन्दामा एक नेपाली

मंसिर १३, सिड्नी । अस्ट्रेलियन फेडेरल प्रहरीले अस्ट्रेलियाको एडिलेटबाट एक नेपाली विद्यार्थीलाई पक्राउ गरेको जनाएको छ । अष्ट्रेलियाको एबीसीका अनुसार उनलाई बुधवार एडिलेडको भित्री शहर स्थित एक घरबाट विद्युतीय उपकरणहरू सहित पक्राउ गरेको हो । पक्राउ परेका नेपालीको नाम भने खुलाइएको छैन ।

“सेक्सटरसन्” वा “रिभेन्ज पर्न” पनि भनिने अरूको अश्लील तस्बिर एवं भिडियोजन्य सामग्री फैलाइदिन्छु भनेर डर देखाई धम्क्याउने कार्यलाई लिएर अस्ट्रेलियाली सङ्घीय प्रहरीद्वारा छानबिन सुरु गरेको मुद्दाहरूमा यो पहिलो हो।

यसै सिलसिलामा, बिहीबार बिहान उनलाई एडिलेड म्याजिसट्रेट्स कोर्ट लागिएको थियो जहाँ उनी माथि सञ्चार सेवाको प्रयोग गर्दै गम्भीर प्रकृतिको धम्की, उत्पीडन वा निजी यौनजन्य सामग्री बाँडेको भन्ने आरोप प्रहरीले उनी माथि लगाएको छ।

आरोपित विद्यार्थीले उनी माथि लगाइएको आरोपहरूको विरुद्ध लड्ने मनसाय राखेको अदालतलाई जानकारी दिइएको बताइएको छ। कमनवेल्थका तर्फबाट मुद्दा चलाउने बोनी रसलले अदालतलाई बताएअनुसार, ती अभियुक्त र उनीबाट पीडित भएकी भनिएकी महिलाबीच संयुक्त अधिराज्यमा एक अति नै घनिष्ठ सम्बन्ध थियो। “प्रतिवादीले संयुक्त अधिराज्य अमेरिका रहेकी पीडित व्यक्तिलाई सम्पर्क गरेर उनीहरू दुई बीच घनिष्ठ सम्बन्ध रहेको बखत लिइएका केही भिडियो तथा तस्बिरहरू अपलोड गर्ने धम्की दिएका थिए,” रसलले भनिन्।

गत अगस्ट महिनामा, ती प्रतिवादीले पीडित व्यक्तिको श्रीमानलाई सम्पर्क गरे र इन्टरनेटद्वारा उनलाई निकै निजी पलहरू कैद भएका भिडियोहरुका “स्क्रिनशट”हरू पठाएको पनि अदालतलाई बताइएको थियो। “संयुक्त अधिराज्यमा रहेका केही अधिकारीहरूले ती स्क्रिनशटहरू मध्ये केही हेरेका छन्,” उनले बताइन। अधिकारीहरूले त्यस पछि अस्ट्रेलियाली सङ्घीय प्रहरीलाई खबर गरेको पनि उनले जानकारी दिइन।

सम्बन्ध विच्छेद भएपछि भने ती व्यक्ती विद्यार्थी भिसामा गत जुन महिना अस्ट्रेलिया आएका थिए, उनले अदालतलाई बताएकी थिइन्। यदि अभियुक्तलाई तारेखमा छाडिए उनी उडेर अस्ट्रेलिया बाहिर जान सक्ने डर भएकालाई थुनामै राख्न पब्लिक प्रोसिक्युसन्सका कमनवेल्थ डाइरेक्टरको जिकिर रहेको पनि रसलको भनाइ थियो। “उनको समुदायसँग खासै सम्बन्ध छैन, त्यस कारण ‘फ्लाइट रिस्क’ पनि छ,” उनले भनिन्। तर, ती अभियुक्तलाई प्रतिनिधित्व गर्दै एक महिला वकिलले भने उक्त नेपाली विद्यार्थी एडिलेडमा अध्ययनरत रहेको र उनले आफ्नो समुदायसँग गहिरो मित्रतापूर्ण सम्बन्ध गाँसेको बताएका छन्।
ती अभियुक्तलाई थुनामा नराखे उनले “क्लाउड”को माध्यमबाट पुनः ती चित्रहरूसम्म पहुँच पाएर फेरी इन्टरनेटमा हालिदिन सक्ने डर विद्यमान रहेको पनि बताइँदै गर्दा उनका वकिलले ती विद्यार्थीले अदालतद्वारा आदेश जारी गरिए आफूले इन्टरनेट चलाउन छोडी दिने र आफ्नो उबर इट्सको काम पनि त्यसै कारण छोडी दिने अदालतलाई बताएकी थिइन््र अस्ट्रेलियन फेडेरल पुलिसका सुपरिटेन्डेन्ट गेयल मक्लुरका अनुसार ती अभियुक्तले उनी अर्कै देशमा भएको र अस्ट्रेलियाली नागरिक पनि नभएको कारण प्रहरीले उनी माथि मुद्दा चलाउन नसक्ने पीडित महिलालाई बताएको र तिनले प्रहरीलाई उक्त कुरा भनेको जानकारी दिए।

“यस मामिलाबाट के प्रस्ट हुन्छ भने तपाईँ जहाँ बसे पनि फरक पर्दैन। एकदमै विशिष्ट स्थितिमा रहेको अस्ट्रेलियाली सङ्घीय प्रहरीका अधिकारीहरू संसारभर छरिएर रहेका छन् र हामीसँग एकदमै बलियो अन्तर्राष्ट्रिय सञ्जाल पनि छ जसले विश्वको कुनै पनि कुनामा गरिएका आपराधिक मामिलाहरू अनुसन्धान गर्नुका साथै मुद्दा चलाउन सक्छ,” उनले भनिन्।