राससको सेवालाई गुणस्तरीय र व्यावसायिक बनाइनुपर्ने

रासस परिसरमा भएको अभिमुखीकरणमा पत्रकारिता क्षेत्रका १६ जना विज्ञहरुले राससको सेवालाई गुणस्तरीय र व्यावसायिक बनाउनेबारे प्रशिक्षण दिनुभएको थियो ।

उहाँहरुले अहिलेको सन्दर्भमा राससको महत्वलाई बुझेर आधुनिक प्रविधिमैत्री बनाइ यस संस्थाको छुट्टै पहिचानको रुपमा विकास गरिनुपर्नेमा जोड दिनुभयो ।

प्रशिक्षणमा प्राध्यापक तथा राससका पूर्वअध्यक्ष पी खरेल, राससका पूर्वमहाप्रबन्धक श्रीरामसिंह बस्नेत, प्रा रामकृष्ण रेग्मी, भाषा अभियन्ता डा बलदेव अधिकारी, नागरिक दैनिकका प्रधान सम्पादक गुणराज लुइँटेल, अनलाइन खबरका सम्पादक अरुण बराल र पत्रकार मोहन मैनालीले प्रस्तुति दिनुभएको थियो ।
राससका अध्यक्ष कुलचन्द्र वाग्ले, सञ्चालक समिति सदस्य डिल्लीराम भट्टराई, नायब महाप्रबन्धक सुरेन्द्रबहादुर नेपाली, प्रशासन प्रमुख सोमनाथ लामिछाने, प्रधानसम्पादक राजु शाक्य, प्रमुख समाचारदाता सूर्यचन्द्र बस्नेत, वरिष्ठ कार्यकारी सम्पादक श्याम रिमाल, अङ्ग्रेजी समाचार शाखाका प्रमुख दीपराज सन्याल र अन्तर्राष्ट्रिय समाचार शाखाका प्रमुख एकराज पाठकले प्रशिक्षण दिनुभएको थियो ।

अभिमुखीकरणको समापन गर्दै राससका अध्यक्ष कुलचन्द्र वाग्लेले चार दिने अभिमुखिकरणबाट पाएको ज्ञान र सीपलाई व्यावहारिक प्रयोग गरेको खण्डमा राससको सेवा अझ गुणस्तरीय र व्यावसायिक बन्ने विश्वास व्यक्त गर्नुभयो ।

उहाँले पत्रकारिताको व्यावसायिक धर्म निर्वाह गरी राससको सेवालाई निष्पक्ष र विश्वसनीय बनाउनेतर्फ सबैको ध्यान केन्द्रित हुनुपर्नेमा जोड दिनुभयो ।

राससका महाप्रबन्धक ओपेन्द्र शर्माले राससको सेवालाई गुणस्तर, विश्वसनीय र समयसापेक्ष बनाउन विज्ञहरुबाट आएको सुझाव आगामी दिनका लागि मार्गदर्शक हुने बताउनुभयो ।

उहाँले यस्ता अभिमुखीकरणलाई आगामी दिनमा समय सान्दर्भिक बनाई क्षेत्रीयस्तरसम्म लैजान आवश्यक पहल गर्ने प्रतिवद्धता जनाउनुभयो । सहभागीका तर्फबाट मोहिनी मिश्र, नारायण अधिकारी र अशोक घिमिरेले अभिमुखीकरणले सेवा प्रवाहका बेला भएका कमजोर र सवल पक्षलाई उजागर गरी आगामी दिनमा गुणस्तर कायम गर्न सहयोग पुग्ने विश्वास व्यक्त गर्नुभयो ।