तम्घास (गुल्मी), २० असार । मुसिकोट नगरपालिकाका नवनिर्वाचित प्रमुख सोमनाथ सापकोटा तथा उपप्रमुख कमला गौतमले पदभार ग्रहण गर्नुभएको छ ।
निर्वाचन अधिकृतको कार्यालयमा सपथ लिएलगत्तै दुवै जनाले नगरपालिकाको कार्यालय वामी टक्सारमा गई पदभार ग्रहण गर्नुभएको हो ।
शपथग्रहण कार्यक्रममा प्रतिवद्धता मन्तव्य व्यक्त गर्दै प्रमुख सापकोटाले भौतिक पूर्वाधार निर्माण, जनमैत्री प्रशासन तथा गरिबी र विकटताका कारण आधारभूत आवश्यकताबाट पछि परेको समुदायको कामलाई पहिलो प्राथमिकता दिने बताउनुभयो ।
“घोषणा पत्रमा उल्लेख गरे बमोजिम सबै पार्टीसँग समन्वय सहकार्य गरेर काम गर्छु,” उहाँले भन्नुभयो । सापकोटाले आफू चुनावमा फरक पार्टीबाट उम्मेदवार बनेपनि निर्वाचित बनेपछि मुसिकोट नगरपालिकाको साझा प्रमुख भएकाले जिम्मेवारीपूर्वक काम गर्ने प्रतिवद्धता व्यक्त गर्नुभयो ।
उपप्रमुख शर्माले नगरवासी र नगरको विकासका लागि निष्ठापूर्वक काम गर्ने बताउनुभयो ।
कार्यक्रममा पूर्व सांसद कमल श्रेष्ठ, एमालेका मुसिकोटनगर कमिटी अध्यक्ष जीवन खरेल, (माओवादी केन्द्र)का कृष्णप्रसाद काफ्ले, जनमोर्चाका मोहनलाल श्रेष्ठ, मालेका राजकुमार श्रेष्ठलगायतले नवनिर्वाचित सम्पूर्ण पदाधिकारीलाई बधाईसहित सफल कार्यकालको लागि शुभकामना व्यक्त गर्नुभएको थियो ।
निर्वाचन अधिकृत घनश्याम न्यौपानेले प्रमुख, उपप्रमुख, वडाध्यक्ष तथा सम्पूर्ण वडा सदस्यलाई शपथग्रहण गराउनुभएको थियो ।
प्रतिक्रिया