अग्नि नियन्त्रण एवम् उद्धार तालिम

कार्यालयका अग्नि नियन्त्रक कर्मचारी र स्थानीय युवाका लागि ग्यास, पेट्रोलियम पदार्थ, भौतिक संरचना एवम् भिन्न प्रकारका केमिकलहरुमा लाग्ने आगो नियन्त्रण र उद्धारका कार्य कसरी गर्ने भन्नेबारेमा एकहप्ते तालिम प्रदान गरेको हो ।

कार्यालयका प्रमुख विजयप्रसाद धौभडेलले आगलागी हुँदा दमकल एवम् सुरक्षाकर्मी भन्नेबित्तिकै पुग्ने अवस्था नरहने अवस्थामा स्थानीयस्तरमा तालिम प्राप्त युवाले अग्नि नियन्त्रण एवम् उद्धारका कार्यमा महत्वपूर्ण भूमिका खेल्ने विश्वास व्यक्त गर्नुभयो ।

तालिमको समापन अवसरमा आज सहभागी प्रशिक्षार्थीलाई प्रमुख जिल्ला अधिकारी द्रोण पोखरेलले प्रमाणपत्र वितरण गर्नुभयो ।

सो अवसरमा उहाँले आर्थिक स्रोत र साधनको अभावका बाबजुद पनि जुद्घ वारुण यन्त्र कार्यालयले तालिम सञ्चालन गरेर उदाहरणीय काम गरेको बताउनुभयो ।

जिल्ला समन्वय समितिका सचिव धु्रुवप्रसाद कोइरालाले अग्नि नियन्त्रण कार्यबाट समाजमा युवाले छवि र प्रतिष्ठा बढाउन सक्ने बताउँदै मानिसले जीवनभर कमाएको सम्पत्ति र धन निमेषभरमा नष्ट हुनबाट जोगाइदिन सके ठूलो सेवा र धर्म हुने उल्लेख गर्नुभयो ।

नेपाल उद्धार तथा अग्नि निवारण सङ्घका अध्यक्ष एवम् तालिमका प्रमुख प्रशिक्षक अरुणकुमार आचार्यले अबको हरेक स्थानीय तहमा अग्नि नियन्त्रक चाहिने अवस्थामा तालिम प्राप्त व्यक्तिले त्यहाँ रोजगारीको अवसर प्राप्त गर्न सक्ने बताउनुभयो ।

तालिम संयोजक मधुसूदन थापाले अग्नि नियन्त्रणका लागि सहरका बस्तीमा छिर्न ठूलाभन्दा पनि साना साधन आवश्यक रहेको बताउनुभयो ।

सहभागी प्रशिक्षार्थीमध्येबाट गोपाल थापा र रेश्मी जोशीले आगलागीको प्रकार तथा क्षति नियन्त्रण एवम् पीडितको उद्घारबारे नयाँ ज्ञान सिकेको बताउनुभयो ।
गत असार १२ गतेदेखि सुरु भएको सो तालिममा सयजना प्रशिक्षार्थीको सहभागिता थियो ।