१२ मंसिर २०७८, आइतबार । November 29, 2021

मुख्य खबर

डडेल्धुरामा ९८ प्रतिशत काम उपभोक्ता समितिबाट



डडेल्धुरा, १८ माघ । डडेल्धुरामा विकास निर्माणका अधिकांश सार्वजनिक कार्य उपभोक्ता समितिबाट गरिने जनाइएको छ ।

डडेल्धुरामा सार्वजनिक तथा रु ६० लाखभन्दा कमका आयोजनामा खानेपानी, बाटोघाटो, सिँचाइ निर्माण, सडक खन्ने जस्ता ९८ प्रतिशत कार्य आम नागरिक तथा उपभोक्ता समितिबाट गरिने स्थानीय विकास अधिकारी ज्ञानेन्द्र पराजुलीले एक कार्यक्रममा खुलासा गरे।

प्राविधिकरुपले जटिल मानिने र रु ६० लाखभन्दा बढीका आयोजना मात्र टेन्डर प्रक्रियाबाट हुने र बाँकी सम्पूर्ण कार्य उपभोक्ता समिति र आम नागरिकबाट भइरहेका स्थानीय विकास अधिकारी पराजुलीले जानकारी गराए ।

उपभोक्ता समितिबाट काम गराउँदा स्थानीयबासी आर्थिक रुपमा पनि सवल बन्दै गइरहेका र आफ्नो ठाउँमा भइरहेका विकास निर्माणका कार्य छिटोछरितो र पारदर्शी किसिमले भइरहेको जनाइएको छ । आफ्नो विकास निर्माणको काम आफैँले गर्न पाउँदा स्थानीय मानिस पनि खुसी हुनुका साथै अपन्वत्वको भावना जाग्रित भई काम पनि गुणस्तरीय हुने गरेको उपभोक्ताको भनाइ रहेको छ ।

जिल्लाका अधिकांश भागमा निर्माणाधीन अवस्थामा रहेका विकास निर्माणका कार्य तीव्रगतिमा भइरहेको समेत जिल्ला प्राविधिक कार्यालय डडेल्धुराका सहायक सव इन्जिनियर टेकबहादुर भण्डारीले बताए ।

प्रकाशित : १८ माघ २०७३, मंगलबार